“Bitcoin Sri Lanka” බ්ලෝග් පේජ් එකට ඔයාව සාදරයෙන් පිලිගන්නවා. අපි යන්න හදන්නේ බිට්කොයින් ලෝකේ ඇතුලෙ හරි අපූරු චාරිකාවකට. මේ චාරිකාව අන්තිමට නතර වෙන්නේ මුදල් ගැන , ඉතුරුම් ගැන, සහ මූල්‍ය නිදහස ගැන ඔයා හිතන ආකාරය සම්පූර්ණයෙන්ම වෙනස් කරලා. මොකද බිට්කොයින් කියන්නේ ඒ වගේ පෙරලිකාර තාක්ෂණයක්. ඇත්තටම ඒක මැජික් එකක්.
ඉතින් අපේ බ්ලොක් පේජ් එකම නිර්මාණය වෙන්නේ බිට්කොයින් එහෙම නැත්තම් BTC ගැන උනන්දු ඔයා වෙනුවෙන්මයි. බිට්කොයින් එක්ක කොහොමද වැඩ කරන්නෙ, කොතනින්ද ආරම්භ කරන්නේ, මේ හැමදේම බිට්කොයින් එක්ක ගනුදෙනු කරද්දී අපිට අනිවාර්යෙන්ම ඉගෙන ගන්න වෙනවා.
ඒත් ප්‍රශ්නෙ තියෙන්නේ, ශ්‍රී ලංකාවේ බිගිනර්ස්ලට මේ ඩිජිටල් future එක විශ්වාසයෙන් ඉගෙන ගන්න හරියනම platform එකක් නැති එක. bitcoin sri lanka බ්ලොග් පේජ් එකෙන් විශ්වාසවන්ත විදිහට bitcoin ගැන ඉගෙන ගන්න ආස ලාංකික ඔයාට උදව් කරන්න බලාපොරොත්තු වෙනවා.
අද ලිපියෙන් කතා කරන දේවල් මේ youtube වීඩීයෝ එකෙන් ඉතාම පැහැදිලිව බලාගන්න පුලුවන්. ඔයා කැමතිනම් මේ වීඩීයෝ එක බලන්න.
Bitcoin කියන්නෙත් එක්තරා විදිහකට මුදල් වර්ගයක්. දැනටමත් ඔයා ඒක දන්නවා ඇති. bitcoin ගැන තේරුම් ගන්න නම් මුලින්ම මුදල් ගැන සහ මුදල්වල ඉතිහාසය ගැනත් අපිට පොඩි අවබෝධයක් තියෙන්න ඕන. අද තියෙන තත්ත්වයට මුදල් එක පාරටම පරිණාමය වුණේ නෑනේ.
ඉතින් අද, මුදල් කියන්නේ මොනවද?, ගනුදෙනු කරන මාධ්‍යයක්, මුදලක් විදිහට හඳුන්වන්නේ මොන ගුණාංග තිබුණොත්ද සහ මුදල්වල ඉතිහාසය ගැනත් අද අපි කතා කරන්න බලාපොරොත්තු වෙනවා.
what is the money
මුදල් කියන්නේ මොනවද? මුදල් එහෙම නැත්නම් සල්ලි කියන්නේ හැම තැනම තියෙන දෙයක්. අපි ඉපයීම, වියදම් කිරීම ඉතිරිකිරීම සහ අනාගතය සැලසුම් කිරීමේදී පවා අපිට මුදල් වැදගත් වෙනවා.
මුදලක් කියන්නෙ මොනද කියලා නිර්වචනයකින් පැහදිලි කලොත්,
“අපිට අපේ සමාජයේ විවිධ භාණ්ඩ හා සේවා මිලදීගන්න භාවිතා කරන පොදුවේ පිළිගන්න ඕනෑම හුවමාරු මාධ්‍යයක් මුදලක් විදිහට හදුන්වන්න පුලුවන් ”.
At its core, money is a tool. අවසාන වශයෙන් මුදල් කියන්නේ tool එකක්.
මුදල් ගැන කතා කරද්දි කතා කරන්නම ඕන දෙයක් තියෙනවා. ඒ මුදල්වල තිබිය යුතු ගුණාංග. ගනුදෙනු මාධ්‍යයක්, මුදලක් විදිහට නම් කරන්න නම් මේ ගුණාංග අනිවාර්යෙන්ම තියෙන්න ඕන. අපි කතා කරමු වැදගත් ගුණාංග පහක් ගැන.
1.කල් පැවැත්ම
පලවෙනි ගුණාංගය තමයි කල්පැවැත්ම. මුදලක් දීර්ඝ කාලයක් පවතින්න ඕන. රන් කාසියක් ගත්තම ශතවර්ෂ ගණනාවක් යනකම් ඒකෙ වටිනාකම නැතිවෙන්නේ නෑ. ඒකනේ ඉතින් තවමත් ලංකාවෙ රත්රන් කාසි වලට ලොකු ඉල්ලුමක් තියෙන්නේ. අවුරුදු දහස් ගණනක් ගියත් රත්තරන් වල වටිනාකම නැතිවෙන්නේ නැහැ.
මුදලක් නොවන දේවල් කාලයක් යනකොට විනාශ වෙනවා. වටිනාකම අඩුවෙනවා. හිතන්නකෝ පලතුරු වෙළෙන්දෙක් ඉන්නවා. ඒ පළතුරු වෙළෙන්දා ළඟ රුපියල් 1000ක් වටින පලතුරු ටිකක් තියනවා. මේ පලතුරු වෙළෙන්දා රුපියල් දාහකට පලතුරු ටික විකුණන්නෙ නැතුව තියාගෙන ඉන්නවා. සතියක් විතර යද්දී පලතුරු ටික නරක් වෙලා විනාශ වෙලා යනවා. ඔයාට තේරෙනවද රුපියල් දාහක් ඒ පලතුරු ටික වටිනවා වුනත් ඒ ටික විකුණලා මුදල් කරගත්තේ නැත්නම් පලතුරුවල නියම වටිනාකම ගන්න වෙන්නෙ නෑ. එහෙනම් ඔයාට තේරෙනවා ඇති මුදලක් කියන දේ කලක් පවතිනවා. මේ පළතුරු වෙළෙන්දා පලතුරු ටික නරක් වෙන්න කලින් ඒ ටික විකුණ ගත්තනම් කොච්චර කාලයක් ගියත් ඒ වෙළෙන්දා ළඟ රුපියල් දාහ තියෙනවා.
2.portability - එහා මෙහා ගෙන යෑමේ හැකියාව
ඔයාගෙ වටපිටාව දිහා චුට්ටක් බලන්නකෝ. මේ වෙලාවෙ ඔයාගේ පර්ස් එකේ තියෙන මුදල් ප්‍රමාණෙට වඩා වටිනා කියන භාණ්ඩ කීයක් ඔයාගේ ගෙදර තියෙනවද. ඒත් මේ දේවල් වටිනවා කියලා මට මේ තියෙන ඔක්කොම ටික මගේ පර්ස් එකේ දාගෙන යන්න බැහැ. ඉතින් මුදල් කියන්නේ අපිට ඉතාම පහසුවෙන් සැහැල්ලුවෙන් ඕනම තැනකට අරගෙන යන්න පුළුවන් දෙයක්. නෝට්ටු වුනත් කාසි වුණත් ක්‍රෙඩිට් කාඩ් එක වුණත් අපිට අපේ වොලට් එකේ දාගෙන ඉතාම පහසුවෙන් අපි යන ඕනම තැනකට අරගෙන යන්න පුළුවන්.
3. divisibility – ඒ කියන්නෙ කුඩා කොටස් වලට බෙදීමේ හැකියාව.
උදාහරණයකින් කිව්වම ටිකක් වැඩිපුර තේරෙන නිසා මම මේ ගුණාංගයත් උදාහරණයකින්ම පැහැදිලි කරන්නම්. නිකන් හිතන්න ගොවියෙක් ඉන්නවා. ඒ ගොවියට වටිනාකමක් තියෙන එකම දේකට තියෙන්නේ ඒ ගොවියගේ හරකා. මේ ගොවියට හරකාව දීලා හාල් සහ තවත් අවශ්‍ය කරන භාණ්ඩ මිල දී ගන්න ඕන. ඒත් ගොවියට මේ ඔක්කොම දේවල් ගන්න නම් හරකව භාණ්ඩ වල වටිනාකම අනුව කුඩා කොටස් වලට බෙදන්න වෙනවා. කඩේ ඉන්න මුදලාලි ඒකට කැමතිවෙයිද දන්නෙ නෑනෙ නේද. අනික කොහොමද එහෙම බෙදන්නෙ? නමුත් හරකා වෙනුවට හරකගෙ වටිනාකමට මුදල් තිබුනනම් ගොවියට බඩු වල වටිනාකම අනුව ළග තියෙන මුදල කොටස් වලට බෙදලා අවශ්‍ය බඩු ටික මිලදීගන්න පුළුවන්. ඉතින් නුදෙනු කරන මාධ්‍යයක් විදිහට මුදල් වලට තිබිය යුතු වැදගත්ම ගුණාංගයක් තමයි කුඩා කුඩා කොටස් වලට බෙදීමේ හැකියාව.
4. Uniformity: ඒකාකාරිබව
සෑම මුදලක්ම එක වගේ වෙන්න ඕන. එක සමාන අගයක්, එක සමාන වටිනාකමක්, එකම ගුණාත්මක බවක් මුදල් වලට තියෙන්න ඕන. වටිනාකමක් නැති කාසි දැන් අපි භාවිතයෙන් ඉවත් කරලා තියෙන්නේ මෙන්න මේ හේතුව නිසා. දැනට ලෝකයේ භාවිතා කරන්නේ සමාන වටිනාකමක් තියෙන මුදල් විතරයි. දැන් ඩොලර් එල
5. Acceptability - පිලිගත හැකිබව
මේ ගුණාංගය ඇත්තටම බැඳෙන්නෙ අපේ විශ්වාසයත් එක්ක. විශ්වාසය කියන දේ නැත්නම් මුදල් නෝට්ටු නිකම්ම කොළ කැල්ලක් විතරයි. කාසියක් නම් නිකම්ම ලෝහ කෑල්ලක් විතරක්ම වෙනවා. මේ දෙකම මුදලක් විදිහට භාවිතා කරන්න නම් මිනිස්සු ඒක විශ්වාසයෙන් පිළිගන්න ඕන. මුදලකට තියෙන්නම ඕන ගුණාංගයක් තමයි මේ පිළිගත හැකිබව.
හරි අපි කතා කලා මුදලක තියෙන්න ඕන ගුණාංග පහක් ගැන. ඉතින් මේ ගුණාංග තියෙන මුදල් අද තියන තත්ත්වයට ආවේ කොහොමද කියලා දැනගන්න එකත් අපිටත් ගොඩක් වටිනවා. මොකද bitcoin වගේ තාක්ෂණයෙන් දියුණු මුදල් ඒකකයකට මුදල් පරිණාමය වුණේ කොහොමද කියලා බලන්නම ඕන දෙයක්.
The history of money
මුදල් වල පරිණාමය සිද්ධ වුන ආකාරය ගැන කතා කරද්දී ඒ ගැන අදියර කිහිපයක් විදියට වෙන් කරගෙන අපිට කතා කරන්න පුළුවන්.
1. භාණ්ඩ හුවමාරුව
අපි මුලින්ම කිව්වා භාන්ඩ හා සේවා ලබාගන්න තමයි මුදල් භාවිතා කරන්නේ කියලා. අතීතයේදි ඒ කියන්නේ මුදල් කියලා දෙයක් හොයාගත්ත නැති කාලේ මුදල් නැතුව කොහොමද මිනිස්සු ගනුදෙනු කරන්න ඇත්තේ. ඒ කාලේ භාන්ඩ හුවමාරුව විදිහට තමයි මිනිස්සුන් ගනුදෙනු කරලා තියෙන්නේ.
ඒ කියන්නේ මෙහෙමයි. ඒ කාලේ හිටපු අතීත මිනිසුන්ට ලොකු අවශ්‍යතාවන් තිබුණෙ නැහැ. එයාලා ගොඩක් වෙලාවට කලේ ගොවිතැන වගේ දේවල්. උපයන නැත්නම් එයාල වගා කරන අතිරික්තය, ඒ කියන්නේ වැඩි කොටස වෙනත් භාණ්ඩයකට හරි සේවාවකට හරි හුවමාරු කිරීම තමයි මුලින්ම සිද්ධ උනේ. වී ගොවිතැන කරන ගොවියා, වැඩි වී කොටස එළවළු වගා කරන ගොවියාට දීලා අවශ්‍ය කරන එළවළු ටික ගන්නවා. එහෙම නැත්නම් වී ගොවියා එයාගේ වී ටික ධීවරයාට දීලා ධීවරයාගෙන් මාළු ගන්නවා. මේ ක්‍රමය ඒ තරම්ම සාර්ථක වුණේ නෑ. මිනිස්සුන්ගේ අවශ්‍යතා සංකීර්ණ වීමත් එක්ක මේ ක්‍රමය අසාර්ථක හුවමාරු ක්‍රමයක් බවට පත්වුණා.
දුර්ලභ භාණ්ඩ මුදල් ලෙස භාවිතා කිරීම.
ඊට පස්සේ මිනිස්සු විවිධ දුර්ලභ භාණ්ඩ මුදල් විදිහට භාවිතා කරන්න පටන් ගත්තා. උදාහරණ විදිහට කිව්වොත් සිප්පි කටු, ලුණු, දුම්කොළ, තඹ යකඩ, රත්තරන් වගේ දේවල් තමයි භාණ්ඩ මුදල් විදිහට මිනිස්සු භාවිතා කළේ. එහා මෙහා ගෙන යන එක අමාරු නිසා වගේම ඉක්මනට විනාශ වීම වගේ දේවල් නිසා මේ ක්‍රමයත් කාලයත් එක්ක අසාර්ථක වුණා.
3. කාසි භාවිතය
තුන්වන අධිරය විදිහට අපට ගන්න පුළුවන් කාසි මුදල් විදියට භාවිතා කිරීම. ලෝකයේ පළවෙනි කාසිය ක්‍රිස්තු පූර්ව 600 දී නූතන තුර්කියේ එහෙම නැත්නම් පැරැණි ලිඩියා රාජධානියේදී තමයි පළවෙනි කාසිය හොයාගෙන තියෙන්නෙ.
මේ කාසිය රත්තරන් වලින් සහ රිදී වලින් තමයි නිර්මාණය කරලා තියෙන්නේ. කාසියට වටිනාකමක් සහ සත්‍යතාවයක් වගේම පිළිගැනීමක් ලැබෙන්න මේ කාසියේ එක එක මුද්‍රා කොටල තියෙනවා. කාසි හොයා ගැනීමත් එක්ක මේ මුදල් එහා මෙහා ගෙන යෑම පහසු වුණා. පිටරට කාසි සොයාගැනීමත් එක්ක ලංකාවටත් මෙම කාසි ඉතා ඉක්මනින්ම ව්‍යාප්ත වුණා.
610–560 BC Lydian electrum coin denominated as 1⁄3
ශ්‍රී ලංකා ඉතිහාසය ආසාවෙන් ඉගෙන ගත්ත අයට නම් මතක ඇති අතීතයේදී භාවිතා කරලා තියෙන කාසි මොනවද කියලා. ශ්‍රී ලංකාවට වැඩිපුරම කාසි ලැබිල තියෙන්නේ විදේශික ආක්‍රමණිකයන්ගෙනුයි විදේශික වෙළෙදොන්ගෙනුයි. ලංකාවේ මුල්ම කාසිය කහපණ නමින් හදුන්වනවා. මේ කාසිය නිර්මාණය කරලා තියෙන්නේ ඉන්දියාවේ කාසි අනුගමනය කරලා.
ලංකා ඉතිහාසය නිර්මාණය වෙලා තියෙන්නෙ යුග ගණනාවක එකතුවකින්. මේ එක එක යුගවල භාවිතා කරලා තියෙන්නේ එක එක කාසි වර්ග. කාසි වර්ග වලට උදාහරණ කීපයක් මේ විදිහට නම් කරන්න පුළුවන්. කහ පණ, සිංහා කාසි, රන් කහවණු , මස්සකාසි, සේතු කාසි, තුට්ටුව, තුට්ටුව කාසිය බ්‍රිතාන්‍ය ආක්‍රමණ කාලෙදි ලංකාවට හම්බුන කාසියක්. පනම කාසිය ලැබුණේ පෘතුගීසීන්ගේන්. පතාග කාසිය, මේ කාසියට ඉංග්‍රීසි භාෂාවෙන් රික්ස් ඩොලර් (rix dollar) කියලා හදුන්වනවා. ඒවගේම මේක ලංකාවට ලන්දේසීන්ගෙන් හම්බුන කාසියක්. තව උදාහරන කීවොත්, දොයිතු ,රුපියල් කාල, රුපියල් බාගෙ, කාසිත් අතීතයේදී භාවිතා කරලා තියෙනවා. බ්‍රිතාන්‍ය යුගයේදී තමයි රුපියල කියන එක හඳුන්වල දීල තියෙන්නෙ. යටත් විජිත කාලයේදී ලැබුණු කාසි වගේම රෝම කාසිය, අරාබි කාසිය, චීනකාසිය වගේ විවිධ රටවල් වලින් ලංකාවට ලැබුණු කාසිත් ඉතිහාසයෙන් හොයාගෙන තියෙනවා.
කඩදාසි මුදල්
කාසි භාවිතයත් කාලයක් යනකොට යම්තාක් දුරට අසාර්ථක වුණා. ඉතින් පහසුව සහ භාවිතයේ සැහැල්ලුව නිසා කඩදාසි මුදල් භාවිතයට මිනිසුන් පෙළබුණා.
ක්‍රිස්තු වර්ෂ 800 දී චීනයේ ටෑං රාජ වර්ෂයෙන් පළවෙනි නෝට්ටුව සොයා ගත්තා. කුබ්ලයි ඛාන්ගෙ අධිරාජ්‍ය සමයෙදි ලෝහ මුදල් වෙනුවට කඩදාසි මුදල් හදුන්වා දුන්නා. කාසි වගේ නෙවෙයි. නෝට්ටු, එහා මෙහා ගෙනියන්න පහසුයි. නෝට්ටු හොයා ගැනීම කාසි වලින් තිබුණු කරදර ගොඩක් අඩු කළා.
Song dynasty Jiaozi, the world's earliest preserved paper money
දහතුන් වන සියවසේ දී මාර්කෝ පෝලෝ චීනයේ මේ මුදල් නෝට්ටු පිළිබඳ දැනුම යුරෝපයට අරන් ගියා. කොහොම උනත් 17 වන සියවසේදි තමයි යුරෝපයේ කඩදාසි මුදල් අච්චු ගැහීම ආරම්භ වුණේ.
අපි මේ කතා කළේ ලෝකයේ මුලින්ම මුදල් බිහිවීම පිළිබඳවනේ. ලංකාවේ මුදල් නෝට්ටුව කොයි විදිහටද ආරම්භ උනේ කියලා අපි ටිකක් බලමු.
1787 ඒ කියන්නේ ලන්දේසීන්ගේ අවසන් පාලන කාලයේදී වගේ ලන්දේසින් විසින් ලංකාවට පළවෙනි නෝට්ටුව ඉදිරිපත් කරනවා. මේ නෝට්ටුව පතාග නෝට්ටු කියල තමයි හඳුන්වල තියෙන්නෙ. පතාග පනහ සීය පන්සිය දාහ වගේ නෝට්ටු ඒ කාලේ අච්චු ගහල තියෙනවා.
යටත් විජිත සමයේ බ්‍රිතාන්‍ය යුගයේදී තමයි නිළ මුදල් නෝට්ටු නිකුත් කිරීම ආරම්භ වුණේ. මේ කටයුත්ත ආයතන තුනකට බාර දීලා තියෙනවා.
පළවෙනි එක මහා භාණ්ඩාගාරය. මහා භාණ්ඩාගාරයෙන් මුදල් නිකුත් කරලා තියෙන්නෙ 1827 ඉඳලා 1855 වෙනකන්.
දෙවැනි ආයතනය තමයි පෞද්ගලික බැංකු. පෞද්ගලික බැංකුවලින් මුදල් අච්චු ගහල තියෙන්නේ 1844 ඉදලා 1884 වෙනකන්.
තුන්වෙනි එක මුදල් කොමසාරිස් මණ්ඩලය. මේ ක්‍රමය 1884 ඉඳලා 1950 වෙනකම්ම ක්‍රියාත්මක වෙලා තියෙනවා.
ලංකාවේ දසදහසේ නෝට්ටුවක් තිබිලා තියෙනවා. නමුත් ඒ නෝට්ටුවෙන් ගනුදෙනු කරලා තියෙන්නේ බැංකු අතර විතරයි කියලා තමයි සදහන් වෙන්නේ.
යටත් විජිත සමයෙන් පස්සේ ඒ කියන්නේ 1949 න් පස්සේ මහා බැංකුව ලංකාවේ පිහිටවනු ලැබුවා. ඊට පස්සේ අද වෙනකම්ම නෝට්ටු මුද්‍රණය කිරීම හා කාසි නිර්මාණය කිරීම මහා බැංකුවේ කටයුත්තක් වෙලා තියෙනවා.
ඩිජිටල් මුදල්
කඩදාසි මුදල්වලින් පස්සේ මුදල් පරිණාමය සිද්ද වෙන්නේ ඩිජිටල් මුදල් වලට.
විසිවන සියවසේ මැද භාගය වෙනකොට මේ යුගය ආරම්භ වුණා. credit card,ඒ කියන්නේ හර කාඩ්පත් බැර කාඩ්පත් ගණනාවක් මුදල් වෙනුවට මේ කාලයේදී ආදේශ වුණා. online banking වගේ තාක්ෂණික මුදල් ගනුදෙනු මේ කාලය වෙනකොට ඉතාම ජනප්‍රියයි.
ලංකාව ගැන කතා කලොත් ezcash, Mcash, frime, වගේ මොබයිල් වොලට්ස් දක්වාම මූල්‍ය ගනුදෙනු ඇවිල්ල තියෙනවා. අද වෙනකොට අපේ මොබයිල් එකට එක ටච් එකකින් ඕනම භාණ්ඩයකට බිල් එකකට පේමන්ට් එකේ තියෙන කඩේකට පවා ගෙවීමේ හැකියාව තියෙනවා.
මුදල් ඉතිහාසය ගැන අපි ගොඩක් කතා කළා. දැන් කතා කරන්න ඕන අනාගතය ගැන. මොකද ඩිජිටල් මුදල් තවත් ඉස්සරහට යනවා. ක්‍රිප්ටො කරන්සි කියන්නෙත් digital money වල දිගුවක්. ඉතින් අපි ඉස්සරහට මේ ගැන, bitcoin සහ අනාගතය ගැනත් අපි කතා කරමු.
2009 දී bicoin පෙරළිකාර විදිහට ලෝකයට ආවා. bitcoin කියන්නෙත් ගනුදෙනු කරන මාධ්‍යයක්. නමුත් කාසි, නෝට්ටු නැහැ. බැංකුත් නැහැ. මේ ගනුදෙනු සිද්ධ වෙන්නේ බ්ලොක් චේන් ටෙක්නොලොජි එකෙන්. ලෝකයේ වෙනත් රටවල නම් මේ දවස්වල වැඩියෙන්ම කතා වෙන ටොපික් එකක් වෙලා තියෙන්නේ මේ bitcoin. ලංකාවට ටිකක් අලුත් දෙයක් වුණත් bit coin ගැන දන්න සහ ඒ ගැන හොයන පිරිස් දැනටමත් මේ වෙනකොට වැඩි වෙලා තියෙන්නෙ.
ඉතින් අද අපි මුදල් කියන්නේ මොනවද? මුදලක් විදිහට හඳුන්වන්න නම් මුදල්වල තියෙන්න ඕන ගුණාංග මොනවද සහ භාණ්ඩ හුවමාරුවේ ඉඳලා cryptocurrency දක්වාම මුදල්වල ඉතිහාසය ගැනත් කතා කළා.
දැන් ඔයා හිතනවා ඇති bitcoin ගැන නම් අපි කතා කරන්නේ, bitcoin ගැන නම් අපි ඔයාට උගන්නන්නේ ඇයි මේ තරම් දේවල් ඔයා එක්ක කතා කලේ කියලා. නිකම් හිතන්න , අපි කතා කරපු ගුණාංග පහත් bitcoin වලට තියෙනවා නම්. ඒ වගේම අතීතෙදී සිප්පිකටු, ලුණු, දුම්කොල වගේ දේවලුත් මුදල් විදිහට පාවිච්චි කරලා තියෙනවා නම් ඇයි තවම බිට්කොයින් මුදලක් විදිහට මිනිස්සු සම්පූර්ණයෙන්ම භාරගන්නේ නැත්තේ. මේක ටිකක් කල්පනා කරන්න ඕන ප්‍රශ්නයක්. ඉතින් කල්පනා කරලා ඔයාට හිතන දේ පහලින් අපේ කමෙන්ට් සෙක්ශන් එකේ කමෙන්ට් කරන්න අමතක කරන්න එපා.
bitcoin ගැන කතා කරන්න දේවල් ගොඩක් තියෙනවා. bitcoin කියන්නේ මොනවද? ආරම්භ වුණේ කොහොමද, වගේ තව ගොඩාක් විස්තර අපි ඊළඟ ලිපි වලින් කතා කරන්න බලාපොරොත්තු වෙනවා. ඒ වගේම අපි මේ කතා කරන හැම විස්තරයක්ම ඉතාම පැහැදිලිව අපේ යූටුබ් චැනල් එකේ කහා කරනවා. ඔයාලට පුළුවන් අපේ වීඩියෝ සීරීස් එකත් බලන්න. තවත් ලිපියකින් ඉක්මනින්ම හමුවෙමු.
එහෙනම් හැමෝටම සුබ දවසක්.
අධ්‍යාපනික අරමුණු සඳහා පමණි: මෙම ලිපියේ අන්තර්ගතය වර්තමාන තොරතුරු හා අධ්‍යාපනික අරමුණු සඳහා පමණක් එකතු කර ඇති අතර, කිසිඳු ආකාරයක මුදල් ආයෝජන උපදේශයක් නොවේ.
මූල්‍ය උපදෙස් නොවේ: මෙම ලිපිය සපයා ඇත්තේ තොරතුරු දැනගැනීම සඳහා පමණි අතර එය මූල්‍ය, නීතිමය හෝ බදු උපදෙස් ලෙස නොසැලකිය යුතුය. ඕනෑම මූල්‍ය තීරණයක් ගැනීමට පෙර ඔබගේම පර්යේෂණ සිදු කර බලපත්‍රලාභී වෘත්තිකයෙකුගෙන් උපදෙස් ලබාගන්න.
මූලාශ්‍ර :
Share this post
